學車良師會

學車良師會
新一頁學生留言板 6.
http://www.lcgtclub-hk.com

林Sir好多謝你呢幾個月嚟好有心機同耐性地多方面指導、你雖然風趣幽默，但對駕駛態度、技術及安全有嚴格要求、希望學生考到牌之外、更希望佢哋手車見得人同做一個安全有責任感嘅駕駛者。你每次寫低學生上堂表現、學習進度、根據程度安排吾同路線，針對強弱加強訓練膽量同技術，另外考試前心理準備亦都照顧到位、依家呀囡跟你學車亦獲益不少、希望佢都可以順利合格！感謝

林師傅循循善誘軟硬兼施教車亦非常全面，上堂都好專心，落堂有咩問題都肯答你，亦有好多口訣幫你提升駕駛技巧。唔會限死練考試線。

有時練考試線都會有少少悶，會帶你去其他更實戰同有趣味既地方練習。

最記得帶我去土瓜灣同西貢。土瓜環路面情況絕對比考試線更複雜。練到過死車，小路出大路連轉彎再加斜路起步。

西貢路線要練個膽，軚盤控制，油門同brake控制。畢竟新手通常都係唔敢踩油，成日亂踩brake。遇到天氣好個陣行西貢，真係好chill!

當初朋友真係冇介紹錯😁

今日可以考車成功真係好多謝林師傅呢幾個月既耐心教導🙈平時學車教既技巧同口訣令我容易啲上手改善自己既技術👍🏻另外，練習路試既時候亦會不厭其煩咁提醒我要注意既事項同陷阱位，提升左我對考路試既信心

林師傅態度良好友善，而且預約上課時間相對有彈性👍🏻私心推介林師傅比大家！

感謝林師傳悉心教導，成日教我望遠啲、用個心去揸車，令我有信心應試，短短個幾月時間就拎到車牌！

師傅多謝你咁有心機教我。重考經朋友介紹認識你，第一堂你已經睇得出我既基本功 , 例如轉彎需要多加訓練。你帶左我去唔同嘅地方熟習不同嘅地形，練膽練反應。後尾你知道我拿捏唔到同物體嘅距離感，你就帶我去人多車多嘅地方練習。你唔係淨係幫我準備考試，而係令我面對不同情況都有信心揸車，要安全順暢、合理車速 ! 我會記得架啦。多謝你😊

師傅，這是我的充心留言-

有幸遇到林師傅，對住我這個成日易分心，唔記野的學生，感激你的耐心包容！要你做埋心理醫生，臨考前一晚舉何詩培例子，不要緊張，去享受比賽，今早臨考前泊車一塌糊塗，你不斷重複耐性重造，令我重拾信心乙丙部重考一齊pass , 萬分萬分感謝你！你教我的駕駛知識，嚴格要求的跟足步驟（沒有這些嚴格步驟，我必定又要重考），多謝你的嚴厲和輕鬆並用方法！我唔記野，次次比你問到口啞，真的多謝你包容和耐性的重復！揸車要：- ‘望遠D’. ‘ 用個心去揸車‘，’永遠要有兩手淮備‘。

感謝師傅，碰到你是我的幸運！多謝師傅完成我人生從來沒有想過可以成功的一大挑戰！

多謝林師傅時宜嚴厲斥責，時宜搞爛gap，anyway多謝師傅教導，一次考試合㭘。如有朋友想學車，會推薦師傅，不過會提醒他們，這師傅是個嚴厲師傅，要作好心理準備。祝身體健康，出車平安。

多謝林師傅悉心教導，令我駕駛技術有所進步，每堂也獲益良多👍🏻謝謝

師傅多謝你呀! 考到嗰陣眼濕濕 ! 多謝你咁有耐性教我 , 好似爸爸咁教我 , 我之後會小心駕駛架啦😂同埋會介紹你比朋友! 多謝你❤️❤️

2023年7月10日下午,我同其他既學生一樣去考駕駛執照, 只係我冇一啲人咁幸運抽到其他試場….，我一抽就培正道😭. 啲同事話仲要下午,接放學, 去買餸, 的士上落客之類既突發事特別多, 叫定我一完就去排快期同埋希望抽到第二個考場…！培正道肥佬率特高…..！

我早3個月就經同事個師傅介紹左另一個師傅, 可能我唔係神童所以上左兩堂之後個呀Sir就冇覆我WhatsApp message, 直頭係已讀不回個隻, 一句叫我再搵老師既說話都冇. 經過咁既事！我真係明啲人話學車師傅既質素係可以好參差….. ！我去過d 配對既網站搵師傅 , 但都係好難約 , 因為我係返工同平日成日出差, 佢哋完全覆唔實我, 唔洗出差既平日夜晚,或星期六,星期日有冇時間俾我book…., 時間得返兩個月左右我真心有啲驚唔夠時間, 好彩最後我都係決定搵林師傅試下!

林師傅教既唔單止係考試,仲有路面上既應用, 回旋處既出入同打燈方法, 係實用同理駕駛概念為主. 其實教既內容其他學生都有分享過，我就唔多重覆,不過我會搵林師傅再教我回旋處(對不起忘記了…haha)同埋L位點泊! 多謝林師傅既教導令我可以1 Take Pass!!!!! 祝林師傅路路亨通！身體健康!!!!

永耀師傅, 超多謝你教, 十萬個用心教我. 又篤住我成日錯的位~終於合格, 超開心

今日5-7-2023棍波van 1 take PASS！
首先要多謝林師父既教導，林師父會幫我制訂學習方向，用簡單易懂既說話方式教識我學車并唔係單單為左考試！最後考牌官讚我做得好好👍 我才能成功，林師父都功不可沒！

祝你身體健康啦，幫更多學車既朋友！👍

多謝林sir不斷耐心指導，針對我問題作出教導。希望個個係佢手上都可以1 take pass✅

一位好既教車師傅可遇不可求！感恩我朋友介紹了一位超級專業，教學認真，有耐性，又會用另類訓練方法幫我提升揸車技巧既林師傅！😊

遇到林師傳之前，我每次上堂都好驚好驚⋯一上車就有種將接受行刑的感覺⋯令我好驚揸車，更質疑自己唔應該學車，所以第一次考試係敗給恐懼下。跟林師傅學習，沒有這種感覺，林師傅好清楚我的弱點，我愈驚的，就陪我去克服，我十分欣賞林師傅的駕駛態度，及對教學的要求和執着！我好記得林師傅的一句「我唔想教一個殺人犯出黎」🤣🤣幽默得黎令人反思！林師傅知我信心不足，會跟我分享不同經歷/小故事鼓勵我去享受駕駛過程。這真是學駕駛以外的bonus！慢慢地，我學會享受過程，放鬆心情淡淡定面對不同的路面情況。
YEAH！我pass左喇！✌🏿😍多謝林師傅，以及他專業親切的團隊（葉師傅和江師傅）！所以我在此極力推薦林永耀師傅！你唔單止教識我揸車，亦助我心靈成長😊！我以後揸車都一定會緊記「望遠啲望遠啲」，用心眼去跟地形駕駛❤️😝 做一個安全駕駛者！😊🙏🏽

感恩經朋友介紹下，係retake遇上林師傅！記得第一次跟林師傅上堂，師傅就同我做模擬考試，然後師傅馬上指出我駕駛上需要改善嘅地方，睇得出師傅擁有豐富嘅教學經驗，所以好放心跟師傅學車。林師傅教每個步驟都好仔細，亦都好有耐性，絕對唔會馬虎！師傅亦都針對我好易緊張，遇到突發情況就好驚青，悉心安排特訓路線！最終係油塘pass!!!

好多人話考車pass唔pass係講運氣，但係我會話跟到好師傅先最實際！誠意向大家推薦林永耀師傅！感謝師傅一直嘅教導！祝師傅桃李滿門！

第一次考車唔合格之後有幸經朋友介紹搵到林師傅教我開車。

上完第一堂之後我發覺林師傅同我上個師傅分別好大，林師傅教得十分用心，佢唔係教識我點樣去「應付考試」，而係教識我「揸車」唔同動作背後嘅道理，令你之後開車上路都會一直記住，成為一個負道路責任嘅司機。

我學車時候對路面環境情況敏感度好低，林師傅知道咗就會對症下藥，用盡方法令我時刻關注道路環境，甚至喺我考試之前帶我去一個難開嘅地方練好我啲反應力。之後入試場考試，終於pass咗！

如果大家想搵個好師傅，絕對要黎搵林師傅。

首先最重要係多謝林師傅 , 林師傅唔同我以前學既師傅 , 佢會好細心教導 , 真係想令你識得揸車而唔係淨係為左合格 , 會教左好多另外既路面知識 , 唔係林師傅我應該都pass唔到，thx林師傅

多謝林師傅耐心教導!! 一開頭揸車完全冇sense又手腳唔協調，但係林師傅都仍然好有耐性去教！佢會睇到我手車既弱點，再對正下藥，令我明白要點樣改正，亦更放膽去揸車。
除此之外，林師傅會成日問好多關於路況嘅問題，又會好詳細咁解釋，幫助我加深印象，無論對路試或之後揸車都非常有用！
今次1 take pass 真係多得師父既教導同安排，我自問都係劣徒一個，但佢都可以點得我明！多謝林師傅!!

多謝林師傅既教導！林師傅教既唔單止考試上既野，而係教左好多將來會遇到既事，令到你考到車都夠膽去揸車，多謝林師傅一開始帶左我去山路，令到我更加放膽揸車同更加認識，而且上堂時會好認真講解同用口訣令到我更加易記得，當發現我既問題會重點訓練我既不足，令到我進步，你每堂講既說話我都會銘記於心。另外，學車期間遇到風球，林師傅都好盡責會幫我預備好時間去學車，令到我有準備下去考試。

多謝你，林師傅，我會記住你講既說話，望遠d，要用個心去揸車！

林師傅：睇留言版發現師傅已經教過好多學生，請師傅上載我既留言，以作紀錄，到你成為千人之師可以回顧學生對課堂同師傅個人既評價！！

今日2022.10.26棍波van合併試1 take過，多謝林永耀師傅傳授駕駛技術，弟子向你表示感激！大學畢業後自駕遊西藏新疆係我既夢想，林師傅已為我實現第一步，屆時能夠驅車前往天南地北，穿越峽谷、山丘、沙漠，去千里之外遊賞浩渺天地景色，我必定會記得師傅既耐心教導！同時感謝你拍擋，葉師傅三堂既教導。

知識、技術無價，十分支持兩位師傅持續對社會作出貢獻！

最後祝林師傅、葉師傅身體健康，工作愉快。

今日忠義街私家車一take pass

多謝林師傅由零教到我可以合格，無論泊位調頭，點處理死車出路口都好有心教，仲放心帶我行公路練軚盤及油門掌握👍🏻 另外因為自己處理出口較弱，師傅都專注培訓帶我去比較多要出路口既地方反覆練習，考到牌真係多謝師傅🙏🏻🙏🏻

非常多謝你嘅教導，將重點精要地傳授，又細心地指出我所有嘅問題，清楚示範正確嘅處理方法，令我在短短的十天裏進步神速，先至可以路試合格！再次感激，祝繼續桃李滿門、主恩滿溢！

多謝林師傅耐心教導！佢好快就找出我一直存在的駕駛問題，再運用佢豐富既教學經驗改善我的不足，最後考牌成功！
林師傅是我的啟蒙導師，他提點我「考車最重要揸得暢順同安全」、
「揸車期間要專注」、
「要用個心去揸車」、
「揸車要學識睇遠d」～
師傅，我深深體會到了！祝林師傳桃李滿門！繼續作育英才！

林師傅是一個非常專業的老師，他能準確判斷出我的問題，因材施教。👍🏻

好開心可以1 take pass！多謝林師傅細心教導、講解清晰。當我有疑問的時候，他會配合教材耐心地解答，讓我更容易明白；他更會針對學生嘅弱項作出適合的訓練。衷心感謝林師傅的耐心教導🙏🏻

多謝林師傅悉心教導，詳細分析駕駛要注意的技巧，並會因材施教，重點訓練我不足的地方。林師傅教學中有自創口訣和模型道具，去幫助我理解。全靠林師傅的提醒，讓我在考試面對突發情況時都能冷靜面對，成功通過考試!
祝林師傅生意興隆，身體健康！

1 take pass, that’s what Master Lin got me. He is a very dedicated teacher who actually cares about his students.
 I always look forward to my driving lessons with him. He is very professional and strict, but in a really appreciative way and makes me want to improve myself and learn attentively. The atmosphere is always really nice. We would banter, chat and share experiences during downtimes which made me really comfortable during the lessons. He has the perfect balance of strict and chill that you’d want in a teacher.

The methods he uses to teach are incredibly effective. From the formulas, to the props he uses, the stories, the metaphors, even the way he scolds you. Everything gets engrained in your brain. He is very clear in his teachings and is very patient. Whenever I misremember a step or two (due to the little idiot I am), he would be very patient and will re-explain the steps very clearly, then let me practice until I do it flawlessly.   I had full trust in him in the very first lesson and knew I would be able to pass with him guiding me. I can’t imagine to have been taught by anyone else. Trust me and trust him. You too will 1 take pass just like I did.

Thank you David.